ਵਿਗੜਦੇ ਆਰਥਿਕ ਹਾਲਾਤ ਕਾਰਨ ਪਾਕਿਸਤਾਨ ਹੁਣ ਭਾਰਤ ਨਾਲ ਚੰਗੇ ਸਬੰਧਾਂ ਦੀ ਪਹਿਲ ਕਰਨਾ ਚਾਹੁੰਦਾ ਹੈ। ਜੰਮੂ-ਕਸ਼ਮੀਰ ਦਾ ਵਿਸ਼ੇਸ਼ ਦਰਜਾ ਖ਼ਤਮ ਕਰਨ ਦੇ ਵਿਰੋਧ ਵਿਚ ਪਾਕਿਸਤਾਨ ਦੇ ਤੇਵਰਾਂ ਵਿਚ ਆਈ ਗਰਮੀ ਹੁਣ ਠੰਡੀ ਪੈਣ ਲੱਗੀ ਹੈ। ਧਾਰਾ 370 ਹਟਾਉਣ ਦੌਰਾਨ ਕਪਾਹ ਦੀ ਦਰਾਮਦ ‘ਤੇ ਰੋਕ ਪਿੱਛੋਂ ਹੁਣ ਪਾਕਿਸਤਾਨ ਮੁੜ ਹਾਲਾਤ ਆਮ ਵਾਂਗ ਕਰਨਾ ਚਾਹੁੰਦਾ ਹੈ। ਇਸ ਲਈ ਸਰਕਾਰੀ ਪੱਧਰ ‘ਤੇ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਗਈ ਹੈ। ਇਸ ਰੋਕ ਨਾਲ ਪਾਕਿਸਤਾਨ ਦੀ ਟੈਕਸਟਾਈਲ ਇੰਡਸਟਰੀਜ਼ ਸੰਕਟ ਵਿਚ ਆ ਗਈ ਹੈ।
ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ ਅਧੀਨ ਕੰਮ ਕਰਨ ਵਾਲੇ ਟੈਕਸਟਾਈਲ ਮੰਤਰਾਲੇ ਨੇ ਕੱਚੇ ਮਾਲ ਦੀ ਜ਼ਬਰਦਸਤ ਕਮੀ ਕਾਰਨ ਭਾਰਤ ਤੋਂ ਕਪਾਹ ਅਤੇ ਸੂਤੀ ਧਾਗੇ ਦੀ ਦਰਾਮਦ ਲਈ ਤੁਰੰਤ ਰੋਕ ਹਟਾਉਣ ਦੀ ਸਹਿਮਤੀ ਆਰਥਿਕ ਤਾਲਮੇਲ ਕਮੇਟੀ (ਈਸੀਸੀ) ਨੂੰ ਦਿੱਤੀ ਹੈ। ਅਧਿਕਾਰਤ ਸੂਤਰਾਂ ਨੇ ਇਸ ਦੀ ਪੁਸ਼ਟੀ ਕਰਦੇ ਹੋਏ ਦੱਸਿਆ ਕਿ ਇਸ ਮਾਮਲੇ ਵਿਚ ਇਕ ਹਫ਼ਤਾ ਪਹਿਲੇ ਹੀ ਦਰਾਮਦ ਤੋਂ ਰੋਕ ਹਟਾਉਣ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਗਈ ਹੈ। ਹੁਣ ਫ਼ੈਸਲਾ ਕੈਬਨਿਟ ਨੇ ਕਰਨਾ ਹੈ।
ਦੱਸਣਯੋਗ ਹੈ ਕਿ ਪਾਕਿਸਤਾਨ ਨੇ ਭਾਰਤ ਵਿਚ ਜੰਮੂ-ਕਸਮੀਰ ਵਿਚ ਧਾਰਾ-370 ਹਟਾਉਣ ਦੇ ਫ਼ੈਸਲੇ ਦੇ ਵਿਰੋਧ ਵਿਚ ਕਪਾਹ ਦੀ ਦਰਾਮਦ ‘ਤੇ ਰੋਕ ਲਗਾ ਦਿੱਤੀ ਸੀ। ਇਸ ਪਿੱਛੋਂ ਪਾਕਿਸਤਾਨ ਨੇ ਭਾਰਤ ਖ਼ਿਲਾਫ਼ ਅੰਤਰਰਾਸ਼ਟਰੀ ਪੱਧਰ ‘ਤੇ ਕੂੜ ਪ੍ਰਚਾਰ ਕਰ ਕੇ ਮੁਸਲਿਮ ਦੇਸ਼ਾਂ ਨੂੰ ਲਾਮਬੰਦ ਕਰਨ ਦੀ ਅਸਫਲ ਕੋਸ਼ਿਸ਼ ਕੀਤੀ। ਪਾਕਿਸਤਾਨ ਨਾਸਮਝੀ ਭਰੇ ਫ਼ੈਸਲਿਆਂ ਨਾਲ ਲਾਭ ਦੀ ਥਾਂ ਨੁਕਸਾਨ ਹੋਣ ਪਿੱਛੋਂ ਹੁਣ ਇਨ੍ਹਾਂ ਕਦਮਾਂ ਨੂੰ ਵਾਪਸ ਲੈਣਾ ਚਾਹੁੰਦਾ ਹੈ। ਉਸ ਦੀ ਕਾਟਨ ਇੰਡਸਟਰੀ ਦੀ ਹਾਲਤ ਖ਼ਰਾਬ ਹੋ ਗਈ ਹੈ ਅਤੇ ਕੱਚੇ ਮਾਲ ਦੀ ਜ਼ਬਰਦਸਤ ਕਮੀ ਹੋਣ ਕਾਰਨ ਕਈ ਕੱਪੜਾ ਮਿੱਲਾਂ ਬੰਦ ਹੋਣ ਦੇ ਕੰਢੇ ‘ਤੇ ਹਨ।
