Trump India Visit: ਰਾਸ਼ਟਰਪਤੀ ਅਹੁਦੇ ਦੀ ਸਹੁੰ ਚੁੱਕਦੇ ਹੀ ਭਾਰਤ ਆਉਣਗੇ ਡੋਨਾਲਡ ਟਰੰਪ! ਯਾਤਰਾ ਦੇ ਨਾਲ ਹੀ ਆਪਣੇ ਨਾਂ ਕਰਨਗੇ ਇਹ ਰਿਕਾਰਡ

ਟਰੰਪ ਨੇ ਆਪਣੇ ਪਹਿਲੇ ਕਾਰਜਕਾਲ ਦੇ ਅੰਤਮ ਸਾਲ 2020 ਵਿਚ ਭਾਰਤ ਦੀ ਯਾਤਰਾ ਕੀਤੀ ਸੀ। ਪ੍ਰਧਾਨ ਮੰਤਰੀ ਮੋਦੀ ਨੇ ਟਰੰਪ ਦੇ ਪਿਛਲੇ ਕਾਰਜਕਾਲ ਦੌਰਾਨ ਕੁਲ ਤਿੰਨ ਵਾਰ ਮੁਲਾਕਾਤ ਕੀਤੀ ਸੀ ਤੇ ਹਰ ਮੁਲਾਕਾਤ ਭਾਰਤ-ਅਮਰੀਕੀ ਰਿਸ਼ਤਿਆਂ ਦੇ ਲਿਹਾਜ਼ ਨਾਲ ਮੀਲ ਦੇ ਪੱਥਰ ਸਾਬਤ ਹੋਏ। ਦੋਵਾਂ ਸਿਆਸਤਦਾਨਾਂ ਵਿਚਾਲੇ ਪਹਿਲੀ ਮੁਲਾਕਾਤ ਜੂਨ 2017 ਵਿਚ ਹੋਈ ਸੀ। ਕੁਝ ਮਹੀਨੇ ਪਹਿਲਾਂ ਹੀ ਰਾਸ਼ਟਰਪਤੀ ਬਣੇ ਟਰੰਪ ਨੇ ਮੋਦੀ ਨੂੰ ਵ੍ਹਾਈਟ ਹਾਊਸ ਵਿਚ ਰਾਤ ਦੇ ਖਾਣੇ ’ਤੇ ਬੁਲਾਇਆ ਸੀ। ਟਰੰਪ ਦੇ ਪਹਿਲੇ ਕਾਰਜਕਾਲ ਦੌਰਾਨ ਵ੍ਹਾਈਟ ਹਾਊਸ ਵਿਚ ਰਾਤ ਦਾ ਖਾਣਾ ਦੇਣ ਵਾਲੇ ਮੋਦੀ ਪਹਿਲੇ ਆਲਮੀ ਆਗੂ ਬਣੇ। ਦੋਵਾਂ ਸਿਆਸਤਦਾਨਾਂ ਦੀ ਮੁਲਾਕਾਤ ਮਗਰੋਂ ਜਾਰੀ ਸਾਂਝੇ ਬਿਆਨ ਵਿਚ ਸਰਹੱਦ ਪਾਰ ਦੇ ਅੱਤਵਾਦ ਸਮੇਤ ਭਾਰਤ ਤੇ ਅਮਰੀਕਾ ਨੇ ਬੇਹੱਦ ਸਖ਼ਤ ਲਫਜ਼ਾਂ ਦੀ ਵਰਤੋਂ ਕੀਤੀ ਤੇ ਸਿੱਧੇ ਤੌਰ ’ਤੇ ਪਾਕਿਸਤਾਨ ਨੂੰ ਚਿਤਾਵਨੀ ਦਿੱਤੀ ਗਈ। ਇਸ ਤੋਂ ਕੁਝ ਮਹੀਨਿਆਂ ਬਾਅਦ ਅਮਰੀਕਾ ਤੇ ਭਾਰਤ ਵਿਚਾਲੇ ਟੂ ਪਲੱਸ ਟੂ ਗੱਲਬਾਤ ਸ਼ੁਰੂ ਕਰਨ ’ਤੇ ਸਹਿਮਤੀ ਬਣੀ।

ਇਨ੍ਹਾਂ ਦੋਵਾਂ ਸਿਆਸਤਦਾਨਾਂ ਦੀ ਦੂਸਰੀ ਮੁਲਾਕਾਤ ਮੋਦੀ ਦੇ ਹਿਊਸਟਨ ਵਿਚ ਕਰਵਾਏ ਹਾਊਡੀ ਮੋਦੀ ਪ੍ਰੋਗਰਾਮ ਦੌਰਾਨ ਹੋਈ ਸੀ। ਇਹ ਅਮਰੀਕੀ ਜ਼ਮੀਨ ’ਤੇ ਕਿਸੇ ਵਿਦੇਸ਼ੀ ਸਿਆਸਤਦਾਨ ਦੇ ਸਵਾਗਤ ਵਿਚ ਕਰਵਾਇਆ ਸਭ ਤੋਂ ਵੱਡਾ ਪ੍ਰੋਗਰਾਮ ਸੀ। ਮੋਦੀ ਨੇ ਇਹ ਯਾਤਰਾ ਅਗਸਤ, 2019 ਵਿਚ ਜੰਮੂ ਤੇ ਕਸ਼ਮੀਰ ਵਿਚ ਧਾਰਾ 370 ਹਟਾਉਣ ਤੋਂ ਕੁਝ ਹਫ਼ਤਿਆਂ ਬਾਅਦ ਕੀਤੀ ਸੀ। ਭਾਰਤ ਨੂੰ ਇਸ ਗੱਲ ਦੀ ਚਿੰਤਾ ਸੀ ਕਿ ਕਿਤੇ ਅਮਰੀਕਾ ਤੇ ਹੋਰ ਪੱਛਮੀ ਮੁਲਕ ਇਸ ਫ਼ੈਸਲੇ ਵਿਰੁੱਧ ਕੋਈ ਸਖ਼ਤ ਗੱਲ ਨਾ ਆਖ ਦੇਣ। ਕਈ ਲੋਕ ਦੱਸਦੇ ਹਨ ਕਿ ਹਿਊਸਟਨ ਵਿਚ ਮੋਦੀ ਦੀ ਤਰਫੋਂ ‘ਅਬ ਕੀ ਬਾਰ, ਟਰੰਪ ਸਰਕਾਰ’ ਦਾ ਨਾਅਰਾ ਕੂਟਨੀਤਕ ਮੰਤਵ ਲਈ ਲਗਾਇਆ ਗਿਆ ਸੀ। ਦੋਵਾਂ ਸਿਆਸਤਦਾਨਾਂ ਵਿਚਾਲੇ ਤੀਸਰੀ ਮੁਲਾਕਾਤ ਫਰਵਰੀ 2020 ਵਿਚ ਦੋ ਗੇੜਾਂ ਵਿਚ ਪਹਿਲਾਂ ਅਹਿਮਦਾਬਾਦ ਤੇ ਫਿਰ ਨਵੀਂ ਦਿੱਲੀ ਵਿਚ ਹੋਈ। ਟਰੰਪ ਪਹਿਲਾਂ ਪਰਿਵਾਰ ਸਮੇਤ ਪ੍ਰਧਾਨ ਮੰਤਰੀ ਮੋਦੀ ਦੇ ਗ੍ਰਹਿ ਸੂਬੇ ਗੁਜਰਾਤ ਦੇ ਅਹਿਮਦਾਬਾਦ ਪੁੱਜੇ। ਉਥੇ ਉਨ੍ਹਾਂ ਦਾ ਸਵਾਗਤ ਨਵੇਂ ਬਣੇ ਸਟੇਡੀਅਮ ਵਿਚ ਕੀਤਾ ਗਿਆ। ਟਰੰਪ ਦੇ ਸਵਾਗਤ ਲਈ ਤਕਰੀਬਨ ਇਕ ਲੱਖ ਲੋਕ ਸਟੇਡੀਅਮ ਵਿਚ ਹਾਜ਼ਰ ਸਨ। ਇਸ ਸਵਾਗਤ ਤੋਂ ਗਦਗਦ ਟਰੰਪ ਨੇ ਕਿਹਾ ਕਿ ਅੱਜ ਤੋਂ ਬਾਅਦ ਭਾਰਤ ਲਈ ਮੇਰੇ ਦਿਲ ਵਿਚ ਵਿਸ਼ੇਸ਼ ਥਾਂ ਰਹੇਗੀ। ਅਗਲੇ ਦਿਨ ਨਵੀਂ ਦਿੱਲੀ ਵਿਚ ਦੋਵਾਂ ਸਿਆਸਤਦਾਨਾਂ ਵਿਚਾਲੇ ਦੋ-ਪੱਖੀ ਗੱਲਬਾਤ ਹੋਈ ਸੀ।